Nagsangat nin bagong kaso an Office of the Ombudsman sa Sandiganbayan laban sa dating Ako Bicol Party-list Representative Zaldy Co.
Sa opisyal na pahayag, kinumpirmar kan Ombudsman an pagsangat nin kaso kontra sa mambabatas kaiba an nagkapirang opisyal kan Department of Public Works and Highways o DPWH.
Base sa impormasyon, nagsangat nin kaso an Ombudsman sa pagbalga kan Section 3(e) kan Republic Act No. 3019 o kan Anti-Graft and Corrupt Practices Act, asin Malversation of Public Funds through Falsification of Public Documents sa korte kan Sandiganbayan.
Sinangat an mga kaso kontra sa dating mambabatas asin iba pa matapos na determinaran kan Ombudsman na igwa nin ‘probable cause’ na kasuhan sinda.
Nag-ugat an mga kaso sa suboot pagkaimbwelto ninda sa anomaliyang 77 milyones pesos na flood control project sa Balagtas, Bulacan.
Dawa an dating Public Works Engineer na si Henry Alcantara inot na kabali sa mga pangaran na kakasuhan, dai na siya kinasuhan huli ta yaon na siya sa irarom kan Witness Protection Program.
