Ipigheras kan Alliance of Concerned Teachers (ACT) an saindang mga aktibidades asin pangapudan para sa karahayan kan mga paratukdo asin iba pang trabahador kasabay kan pagromdom kan National Heroes Day.
Sa intrevista kan Bombo Radyo Naga ki Ruby Bernardo – Chairperson, Alliance of Concerned Teachers, sinaysay kaini na kabale sa saindang planong aktibidad iyo an kampanya na “Honor Our Teachers” bilang parte kan Teachers Month puon Setyembre 5 sagkod Oktubre 5, na may katuyuhan na maipaabot an mas marahay na sweldo, benepisyo, asin kondisyon sa pagtrabaho kan mga paratukdo.
An mayor na pangapodan kan grupo iyo an P50,000 na entry-level na sweldo para sa mga paratukdo, P36,000 para sa mga staff, asin P1,200 na living wage para sa mga trabahador. Ipigtutulod man ninda an paglangkaw kan Personal Economic Relief Allowance hale sa P2,000 pasiring sa P5,000 asin supisyenteng pondo para sa Expanded Career Progression.
Tinawang-duon ni Bernardo na kulang an presenteng sweldo kan mga paratukdo huli ta kadaklan sa mga ini naggagastos hale sa sadiring bulsa para sa mga kagamitan asin iba pang pangangaipo sa eskwelahan. Tinawan man niya nin duon an hiwas kan saindang papel, kabali an pagtukdo, paggibo nin mga papeles, pagbisita sa mga harong, mga programa sa pagpakakan asin pagtabang sa mga may kalamidad.
Para sa ACT Teachers Group, an pagmidbid sa mga paratukdo bilang heroe kaipuhan na may kaibang konkretong suporta hale sa gobyerno. An grupo nag-anunsyo man nin mga nakatalaan na konsultasyon asin aksyon para sa mas dakulang pagpondo para sa edukasyon asin mas patas na kondisyon para sa mga paratukdo asin iba pang mga trabahador.
