Nagpagirumdom an Fetoda President sa mga trysicle driver na magin preparado asin magsunod sa mga Regulasyon sa Traslacion.
Sa intrevista kan Bombo Radyo Naga Ki Gil Belen – Fetoda President, sinaysay kaini na nagkaigwa nin pagtitipon an mga ini para sa pagpreparar sa tiglalaomang pagdagsa kan mga pasahero asin bisita sa Naga City para sa Traslacion Procession sa Septyembre 11.
Sa pagtipon, pinagirumduman man an mga driver, partikular an mga nagmamaneho nin trysikel, na magsulot nin tamang uniporme tanganing magin maayos asin desente an pagserbisyo sa publiko sa panahon kan okasyon.
Segun ki Belen, importante an pagsulot nin uniporme kan mga trysikel driver ta makakatabang ini sa madaling pag-identify sainda, lalo na kun may mga driver na mahihiling na naglalabag sa mga ipinatutupad na regulasyon.
Sinabi pa kaini na magkakaigwa man nin dakulang signage na nagpapahiling kan mga itinakdang pamasahe na kun sain man mamahihiling an tamang kantidad kan bayad para sa jeep, trysikel asin iba pang klase nin pampublikong transportasyon.
Dugang pa, pinagirumduman man an mga driver kan mga itinakdang ruta na pwede nindang agihan tanganing malikayan an paglabag sa mga bawal na dalan asin mapadali an pagbiyahe kan mga pasahero.
Mientrastanto, nangapudan man ini sa gabos na trysikel driver na manteniron an kaayusan. Kun may mahiling na driver na naglalabag sa mga regulasyon, sinda ireport o ilista an mga ini sa mga awtoridad para sa kaukulang aksyon.
