Nag-apelar an Pilipinas sa mga miyembro kan Association of Southeast Asian Nations o ASEAN na magin bukas sa mga nag-aadal na mamuhunan o magnegosyo sa Southeast Asian region.
Sa pagbukas kan ika-29 na ASEAN Investment Area o AIA Council Meeting, tinawan-soon ni DTI Secretary Cristina Roque an kahalagahan kan pagpapakusog kan pamumuhunan sa rehiyon tanganing makamit kan mga nasyon an inaasahan na paglago kan ekonomiya.
An investment, segun ki Roque, sarong primerong nagtutulod sa ekonomiya kan Southeast Asia tanganing magin mas competitive.
Tinawan doon man kan sekretarya na an pagiging bukas kan rehiyon sa pamumuhunan magigin paagi tanganing magtiner na competitive an ASEAN asin lalo pang mapakusog an posisyon kaini bilang primerong destinasyon nin negosyo asin mga turista sa Asia-Pacific Region.
Mientrastanto, nanindugan man an kalihim na dai sapat na maipakita kan mga nasyon sa Southeast Asia an saindang pagiging bukas sa investment, kundi kinakaipuhan man na mapanatili ninda an marahay na record.
Segun pa sa opisyal, padagos na sinusuri asin ina-assess kan mga investor an mga kondisyon sa sarong nasyon, kaya mahalagang mamantiner an saindang kumpiyansa sa ekonomiya tanganing magpadagos an operasyon kan saindang mga negosyo.
Tinawan-doon man ni Secretary Roque an pangangaipuhan na madaliang ma-upgrade an ASEAN Trade in Goods Agreement o ATIGA.
Segun pa digdi, dakula na an mga pagbabago sa trading environment sa Asia-Pacific Region, kaya kinakaipuhan nang baguhon an ibang mga probisyon kan ATIGA tanganing maangkop ini sa mga pagbabago sa Southeast Asian Region.
Sa paagi kaini, mas mapapakusog pa an kalakalan, supply chains, asin mga oportunidad para sa mga negosyo sa rehiyon.
