Tinanggihan kan International Criminal Court (ICC) an hiling kan kampo ni dating Presidente Rodrigo Duterte na obligaron an pagkaag nin “Expert verification reports” sa open-source asin user-generated na ebidensya na isinusumite sa tribunal.
Hinagad kan defense team na amyendahan an e-court protocol kan ICC asin magdugang nin “Expert verification” sa sarong partikular na metadata field, an electronic discovery system kan registry kan korte.
Sa pitong-pahinang desisyon na may petsang Setyembre 27, sinabi kan Trial Chamber III na ini pwedeng magkawsa nin dai kaipuhanan na pagkaantala sa pagpoon kan paglilitis huli sa kadakol na ebidensya na kaipuhan surion.
Segun sa Chamber, matutugunan man an katuyuhan kan depensa sa paagi kan presenteng proseso kun sain pwedeng kwestyunon kan mga partido an admissibility o iba pang pamantayan kan ebidensya sa oras na isumite ini o tulos pagkatapos matukoy an isyu.
Nakatalaan na magpoon sa Nobyembre 30 an paglilitis ni Duterte sa ICC.
