Mas tututukan kan Traffic Enforcement Office an mga pedestrian lane asin dagdagan an road signage ngani na mapakarhay an traffic order asin maibitaran an aksidente sa tinampo.
Sa intrevista kan Bombo Radyo Naga ki Arnulfo Fausto, Head, Traffic Management Offic, sinabi kaini na pigkokoordinar an mga nasabing lakdang sa manlaen-laen na ahensya asin stakeholders ngani na masiguro an tamang pagpapautob kan mga ley sa trapiko asin tamang aksyon sa mga bayolasyon asin insidente sa tinampo.
Kabale man sa mga plano an pag-deploy nin criminology interns tanganing magtabang sa traffic enforcement, orog na sa paggiya sa mga pedestrian asin pagtabang sa pagbalyo sa mga pedestrian lane, imbes na magtener sana sa mga trainings asin lectures.
Pig-eksplikar kan opisyal na makakanuod an mga estudyanteng maagi sa Public Safety Office asin iba pang kaugnay na opisina an aktwal na traffic management sa paagi nin field exposure asin pagtabang sa traffic personnel.
Mientrastanto, inako man kan opisyal an kadipisilan na inaagihan kan mga traffic enforcers na naka-duty sa irarom kan mainit na panahon. Segun saiya, igwa nin nakatalaan na duty schedule an mga personahes poon alas 6:00 hasta alas 10:00 nin aga asin alas 3:00 hasta alas 7:00 nin hapon tanganing maibitaran an pinakamainit na oras kan aldaw.
Pighagad man an posibilidad na ibalyo an ibang personahe sa mas angay na mga asignasyon, orog na sa mga enforcer na nadepisilan magtrabaho sa irarom kan labi-labing init.
Piglalaoman na sa paagi nin mas dakul na road signage, mas mahigot na pagbantay sa pedestrian lane asin pakikilabot kan mga Criminology Interns, mas mapakarhay an disiplina kan mga motorista asin kaligtasan kan mga pedestrians.
