Inako ni Bianca Manalo na dai niya nasasabutan kun tano padagos siyang nadadamay sa mga espekulasyon manungod sa pagigin third party, sa ibong kan saiyang paglinaw na siya single asin mayo siyang plano na magdali-dali na maglaog sa bagong relasyon.
Tinutukan kan aktres an mga akusasyon na nag-uugnay saiya sa ibang personalidad, kaiba an aktor na si Rob Gomez asin si Jonathan Sterling, an dating karelasyon ni Celeste Cortesi.
Segun ki Manalo, dae niya aram kun tano pauru-utro na nadadawit an saiyang pangaran sa mga alegasyon manungod sa third party, asin maski ngunyan na single siya, dakul pa man giraray siyang nadadangog na istorya manungod sa saiya.
Nagsuba pa ini na tibaad matapos an pag-kokonektar saiya sa iba-ibang personalidad kun magkaigwa siya giraray nin karelasyon. Alagad, tulos niyang lininaw na dai siya malaog sa sarong relasyon para sana malikayan an mga espekulasyon.
Sa presente, sinabi ni kaini na kontento siya sa saiyang buhay asin mas pinipili niyang gugulon an saiyang oras kaiba an mga tawong pinakaharani saiya kaysa magdali-dali na maghanap nin bagong karelasyon.
Inako man kan aktres na igwa nin nagkapirang tawo na naaakit sa mga isyu asin kontrobersiya. Dugang pa niya, narealisar na man niya na pwede siyang magin parte kan siring na mga urulayan.
Tinawan-duon kan aktres na ipinagtatanggol niya an saiyang sadiri asin pinapahalagahan an mga tawong padagos na nagsusuporta asin nagtindog para saiya.
