Sabay-sabay na ginibo an nagkapirang aktibidad sa covered court kan Barangay Concepcion Pequeña, Naga City bilang parte kan padagos na mga programa kan barangay para sa salud asin kapakanan kan mga residente.
Sa intrevista kan Bombo Radyo Naga Ki Lorena Estayani-Early Childhood Teacher/Educator, sinabi kaini na kabale sa mga aktibidad an lingguhang immunization para sa mga aki na regular na ginigibo kada Miyerkules. An programang ini obheto na mapangataman an salud kan mga aki sa paagi kan pagtao kan mga kinakaipuhang bakuna tanganing makatabang sa pagpugol sa nagkakaibang klase nin mga helang.
Kasabay kaini an mga pagpepreparar para sa mga aktibidad na gigibuhon, kabale na an pagselebrar na may koneksiyon sa United Nations, pati na an Halloween Party kan mga aki sa Educare, na obheto man na magtao nin kalipay sa mga aki asin oportunidad na makukua sinda sa mga makabuluhang programa sa komunidad.
Dugang pa kaini, kabale man sa mga programa an pamamahagi nin mga citronella sa tabang kan Tabang Bicol Movement. May mga barangay na napili bilang mga benepisyaryo kan programang ini tanganing makatabang sa paglaban sa dengue.
An lambang pamilya kan mga residente makakua nin tig-sarong citronella bilang parte kan mga paghihingoa na mapakusog an proteksiyon kan komunidad kontra sa mga lamok na nagdadara nin dengue.
Kabale sa mga napiling barangay na makakua kan nasambitang tabang, an Barangay Concepcion Pequeña, Barangay Concepcion Grande, asin Barangay Del Rosario.
Sa paagi kan aktibidad na ini, padagos na naipapahiling an halaga kan pagtarabang kan barangay, mga organisasyon, asin mga residente sa pagtaguyod kan salud, kaligtasan, asin kapakanan kan kada pamilya sa komunidad.
