Nagpatanid an mga awtoridad kontra sa paggamit nin squishy toys o soft toys na nagin popular na sa mga kaakian ngonian, kasunod kan mga bareta na igwang posibleng presensya kan delikadong kemikal na Benzene na pwedeng makaapektar sa salud.
Sa intrevista kan Bombo Radyo Naga ki Thony Dizon, Campaign/Advocacy Officer, Ban Toxics, sinabi kaini na ipinaliwanag na nagbutwa an mga isyu dapit sa kaligtasan kan nasabing mga aling-alingan makalihis na madiskubre an mga peligrosong kemikal sa parehong produkto sa ibang nasyon, arog kan United Kingdom. Igwa man nin mga inspeksyon sa produkto sa Estados Unidos, Malaysia asin Thailand.
Susog sa ininterbyu, an mga squishy toys nagin popular bilang mga pampahale nin stress, alagad huli sa makolor na disenyo asin garo kakanon na itsura, nagin man ining kaakit-akit sa mga kaakian. Igwa pa ngani nin mga bareta na insidente sa ibang nasyon kun saen sarong aki an nagbugtak nin aling-alingan arog kan dumpling sa microwave, na nagresulta sa pagsabog kan appliance.
Ipinaliwanag man niya na bako gabos na squishy na mga aling-alingan igwa nin parehong mga materyales asin sangkap, kaya importante na helingon an produkto asin seguradohon na ini nagsusunod sa mga pamantayan sa kaligtasan asin pagmarka.
Sa lado kan Food and Drug Administration o FDA, nagpaluwas na ini nin advisory para sa regulasyon asin imbestigasyon kan mga nasabing toys. Dawa ngani an ininterbyu nag-iinsistir, dai nangangahulugan na an ibang klase nin mga squishy toys ligtas huli ta bako sinda kabali sa mga partikular na produkto na sakop kan advisory.
Para sa mga magurang, pinapagiromdom na mag-ingat sa pagbakal nin mga aling-alingan, lalo na ngonian na harani na an Pasko. An tatak, edad na dapat gamiton, asin iba pang impormasyon manungod sa kaligtasan kan produkto dapat na helingon.
Isinuherir man na likayan an mga aling-alingan na may kakaibang hamot, maghugas nin kamot kan mga aki pagkatapos mag-aling, asin magbakal sa mga lehitimong tindahan na nagtatao nin resibo tanganing maprotehiran an mga konsumidor.
Katakod kaini, dapat na iprioritize kan mga magurang an kaligtasan kan saindang mga aki kesa sa kabaratuhan o viralidad kan sarong aling-alingan, tanganing maibitaran an posibleng peligro sa salud kan mga aki.
