Pinahimutikan kan Philippine National Police (PNP) an pagkakaigwa nin ‘shoot-to-kill’ na order kontra ki Senador Ronald “Bato” Dela Rosa sa pagpautob kan warrant of arrest kaini.
Segun ki PNP chief General Jose Melencio Nartatez Jr., katungdan ninda na ipautob an ley asin bako na maghiro sa luwas kaini, na idinuduon an pagsunod sa due process, karapatang pantao, asin rule of law sa gabos na operasyon.
Ini kasunod kan paglakop kan mga pekeng quote card sa social media na nag-aako na nanawagan si Cagayan de Oro Rep. Lordan Suan nin “shoot-to-kill” kontra sa senador, na pinahimutikan man ni Suan.
Mantang, ipinagboot ni Nartatez sa mga yunit kan pulisya na padagoson an intelligence gathering asin monitoring tanganing maaraman an kinamumugtakan ni Dela Rosa.
Si Dela Rosa nag-aatubang nin warrant of arrest konektado sa kasong crimes against humanity sa ICC.
Igwa nin nakalaag na 50-milyong pisong pabuya para sa impormasyon na magtutukdo sa saiyang pagkakadakop.
