NAGA CITY– Bilog an pagtubod kan mismong alkalde kan banwaan nin Milaor, Camarines Sur na supplier kan iligal na droga sa manlaen laen na parte kan probinsya an magtugang na nakuanan nin nasa P5-M kantidad nin shabu sa drug operation kan mga otoridad.
Sa entrevista kan Bombo Radyo Naga ki Mayor Anthony Reyes, sinaysay kaini na an magtugang na Tristan asin Makneil Abinez an nagsusuply nin iligal na droga sa mga banwaan kan Pasacao, Minalabac asin Pamplona.
Nagtutubod naman an alkalde na mapaparalisa ngunian an transaksyon kan droga sa saindang lugar makalihis madakop an mga suspek.
Naglalaom naman si Reyes na makikipagtabangan an mga suspek sa mga otoridad para masusog an iba pang drug personalities na katabang kan mga ini sa transaksyon sa iligal na droga.
Kung marurumduman, maabot sa labi P5 milyon an kantidad kan iligal na droga na nasamsam kan kapulisan sa tahaw kan anti-illegal drug operations kontra sa magtugang na napag-araman na enot nang nagsuko sa mismong alkalde kan nasambitan ng banwaan.
Sa ngunian, nagtitinir na sa kustodiya kan mga otoridad an nasambitan ng mga suspek.
