Pigbuhayagyag kan abogado ni dating Department of Public Works and Highways (DPWH) USec. Catalina Cabral an pira pa sa mga napag-ulayan ninda kan buhay pa an dating opisyal kabali an pogpreparar kan nakalihi na “parametric formula” ni Cabral, na pigsugo ni dating DPWH Secretary Manuel Bonoan tangani na pakarhayon an district allocables, alagad dae sinunod kan Kamara asin nagpanukala nin sadiri nindang adjustments.
Sigun ki Atty. Mae Divinagracia, kinonsulta ni Cabral an sarong ekonomista na dating consultant kan DPWH manungod digde asin man nag-come up sa sarong “algorithmic formula” na pweddeng magin dalan kuta tangani na mahali an discretion sa allocations.
Paliwanag kan abogado, ini an sarong parametric formula kun saen mabugtak sana nin mga detalye sa excel program asin ma-generate na ini nin mga alokasyon para sa kada distrito, na nakabase sa mga criteria siring na sana kan historical allocations, dakol kan populasyon asin poverty incidence.
Dugang pa kan abogado, iprinisenta ni dating Sec. Bonoan an nasambitan ng formula sa liderato kan Kamara de Representantes alagad ini an nirebisa asin ibinalik an mga alokasyon magpuon kan nakalihis na taon. Binalikan kan abogado an saro sa mga pagdangog na isinagibo kan Senate Blue Ribbon Committee kun saen naungkat an urulay sa “National Expenditure Program o NEP computed” asin “NEP restored.”
Ipinaliwanag ni Atty. Divinagracia na an NEP computed iyo an mga kantidad na-generate gikan sa algorithmic formula na pigpreparar ninda Cabral kun saen nabawasan an mga alokasyon para sa kada distrito. Alagad kan ginibo an adjustments, naibalik an mga dating alokasyon. Mantang an NEP restored man an allocables.
Igwa man na inaapod na Senate asin House leadership fund. Pighurot kan abogado na kung nasunod sana an ginibong algorithmic formula ninda Cabral dae kuta magkakaigwa nin discrepancies o pagkakaiba sa allocations.
Basado man sa salaysay ni Cabral, sinaysay ni Atty. Divinagracia na ipinadara ki Cabral an sarong email na igwa nin adjustments sa allocations na gikan soboot sa opisina ni dating Ako Bicol Party-list Rep. Elizaldy Co. Bagaman dae nahiling mismo kan legal counsel an laog o kopiya kan email, sinaysay kaining nasa DPWH email ini saka ipinasa ni Cabral ki Sec. Bonoan na inaprubaran kalaunan.
Pinahimutikan man kan abogado an alegason laban ki Cabral na pinakamakapangyarihan soboot na Undersecretary kan DPWH. Soboot mayo ining ano man na katotohanan huli ta pigsusunod sana kan dating opisyal an mga pigsusugo sa saiya.
