Inihayag ni Senate President Pro Tempore Panfilo Lacson kan nakalihis na Sabado na kaibahan sa mga papag-urulayan sa nakatalaang all-senators’ caucus ngunyan na aldaw na Lunes an padagos na pag-absent ni Sen. Ronald ‘Bato’ dela Rosa sa sesyon kan Senado.
Sigun ki Lacson, kaipuhan liwat na surion an nag-iiral na mga panundonan kan Senado asin aramon kun pano ini naaangkop sa sitwasyon ni Dela Rosa.
Kinumpirmar man ni Senate President Vicente ”Tito” Sotto na dae naglalaog si Dela Rosa sa Senado puon pa kan nakalihis na Nobyembre 11, 2025, asin mayo pang siertong pahayag kun nuarin ini mabweltada.
Kan nakalihis na komplianyo kaini, sinaysay ni Dela Rosa na ini an “waiting for a true seeking for justice,” katakod kan posibleng arrest warrant gikan sa International Criminal Court (ICC) huli sa kasong crimes against humanity na kinaiimbweltuhan ni dating Presidente Rodrigo Duterte.
Kun marurumduman, kaibahan sa dokumento na ibinaba kan ICC kan nakalihis na Pebrero na sinda Dela Rosa sin Sen. Bong Go an posibleng co-perpetrators kan dating Presidente para sa kampanya kaining ”war on drugs.”
Dugang pa ni Lacson, papag-urulayan man sa caucus kun pano dapat makipag-koordinar an Senado sa Embahada kan China makalihis an mga tensiyon sa tahaw kan mga opisyal kan Pilipinas asin China.
Sinaysay man kan senador na mayo ining balak na magdalagan sa 2028 national elections asin plano kaining magretiro sa pagtatapos kan saiyang termino sa 2031.
Ginibo ni Lacson an mga pahayag sa kasuarin sanang alumni homecoming kan Philippine Military Academy, kun saen nag-atendir si Lacson komo miyembro kan Matatag Class of 1971, alagad dae nag-atendir si Dela Rosa, graduate kan Sinagtala Class of 1986.
Kaibahan man sa event si Joe Melencio Nartatez Jr., hepe kan Philippine National Police asin miyembro kan Tanglawdiwa Class of 1992.
