Pig-akusaran ni dating Police Colonel Eduardo Acierto si dating Pang. Rodrigo Duterte na iyo an “protector” kan mga pigtutubudang drug lord na si Michael Yang na sarong dating presidential adviser asin negosyante na si Allan Lim na bisto na ngonyan komo Lin Weixiong.
Sa pag-atubang ni Acierto sa House Quad Committee hearing kan nakalihis na aldaw nin Myerkules, pigsaysay kaini na amigo ni Duterte si Yang asin Lim.
Kan nakalihis na taon nin 2017, natipon kan grupo ni Acierto an pagkakaimbuelto ninda Yang asin Lim sa iligal na droga.
Segun ki Acierto, sigurado siya na huli sa nangyari sa saiyang staff, target na kan dating Presidente an saiyang duwang amigo.
Pigsaysay pa man kan police colonel na nagkidnap ki Capt. Lito Perote asin MSgt Gerry Liwanag.
Nawawara pa si Perote mantang pigadil asin gadan si Liwanag.
Pigbuyagyag ni Acierto na nag-operar si Yang nin clandestine shabu laboratory sa Dumoy, Davao City na nag-manufacturer nin shabu.
Basado sa drug matrix na pigpreparar kan grupo ni Acierto, si Yang sarong miyembro kan Johnson Chua drug syndicate na pinangenotan kan sarong Johnson Co na nakabase sa mainland China.
Mantang si Lim iyo an nagpapadalagan kan clandestine laboratory sa Cavite na pig-raid kan PDEA kan nakalihis na bulan nin Hulyo 2018.
Pigsaysay ni Acierto na kabali an nasambitan ng matrix sa saiyang pagsumiter ki dating hepe kan PNP na si Ronald Dela Rosa asin dating Director General kan PDEA na si Aaron Aquino asin dating hepe kan PNP Oscar Albayalde.
Mientrastanto, mahigot na pigpahimutikan ni dating PDEA Dir. Gen. Wilkins Villanueva na dai nagluwas sa saindang listahan kan pangaran ni Michael Yang na imbuelto sa iligal na droga
