Aram baya nindo mga ka-Bombo na sarong makabagong teknolohiya an ginamit ngunyan sa Florida, U.S.A., tanganing labanan an padagos na pagdakol kan mga invasive species na Burmese phyton sa Everglades, kun saen iyo ini an paggamit kan mga robot na kuneho na idinisenyo tanganing magin paon.
Sigun sa mga opisyal, an pinakadakulang huma sa pagkontrol sa mga python iyo an paghahanap sa sainda huli sa saindang tibay sa pagtatago.
Huli digde, nag-usbong an mga robot na kuneho, naghihiro asin igwang parong na garo totoong kuneho na iyong maakit sa mga halas asin mapaluwas sa saindang mga lungga.
Sa katunayan, kaini sanang summer, 120 na mga robot na kuneho an ipinapalakop komo parte kan sarong eksperimento na pinapangenotan kan South Florida Water Management District asin kan mga scientist gikan sa University of Florida.
Nagluluwas man na an lambang robot an igwang kaibahan na video camera na mapadara nin signal kun igwang paparaning python, na mataong dalan sa mga otoridad na tulos ining dumanan asin dakupon.
An mga ini an nagkakantidad nin poco mas o menos $4,000 (halos P228,000).Alagad maski amay pa tanganing sabihon kun gurano ini kaepektibo, naglalaom sinda kan magayon na resulta.
An mga Burmese python iyo an mga invasice species sa Florida. Bako man ining gikan sa Floridad asin pigkokonsiderar na sarong dakulang huma sa ecosystem kan Everglades.
Puon kan taong-2000, labi 23,000 na python na an nahali sa lugar, alagad padagos pa man an pagdakol kaini.
An proyektong ini an pinakabagong lakdang sa saindang padagos na paghihingowa na protehiran an mga endemic species sa rehiyon.
