Nagdesisyon an sarong korte sa Manila na si dating Bamban Tarlac Mayor Alice Guo an sarong Chinese citizen, kaya nadiskwalipikar ini sa pagkapot kan pampublikong opisina.
Sa 67-page na desisyon na may petsang Hunyo 27, an Manila Regional Trial Court Branch 34 nagtao kan quo warranto petition na isinangat kan Office of the Solicitor General (OSG), na nag-angat sa pagigin kwalipikado ni Guo na magserbi komo sarong elihidong opisyal.
An quo warranto case sarong espesyal na civil action na isinangat kontra sa sarong tawo na nag-aagaw, o ilegal na nagkakapot o nag-eehersisyo nin sarong pampublikong opisina na mayong legal na awtoridad.
Sa irarom kan Rule 66 kan Rules of Court, an Office of the Solicitor General (OSG) awtorisado na magpoon nin sarong petisyon na quo warranto sa atubangan kan sarong korte.
Sa pagtao kan petisyon, an korte bako sanang nagdiskwalipikar ki Alice Guo sa pagkapot kan posisyon komo alkalde kan Bamban kundi nagdeklarar man na ini an bakong kwalipikado na magdalagan para sa opisina sa enot na lugar.
Pigsaysay man kan korte na si Guo mas bistado komo “Guo Hua Ping” an pinangaki kan Chinese parents, na sinda Guo Jian Zhong asin Lin Wenyi, na igwa nin Chinese passports.
An desisyon orog pang naglinaw na an pasaporte ni Guo sa Pilipinas o an saiyang birth certificate dai nagseserbing konklusibong patunay kan saiyang citizenship.
Haros 10 bulan nang nakakulong si Guo huli sa non-bailable charge of qualified human trafficking na naggigikan soboot sa pagkaimbwelto kaini sa iligal na aktibidad kan Philippine offshore gaming operator (POGO) sa saiyang lokalidad sa Bamban, Tarlac.
Alagad padagos na pigpapahimutikan kan dating alkalde na pinaupahan sana kaini an saiyang pagsasadiri sa POGO na embwelto.
Mientratanto, kan Agosto 2024, an Opisina kan Ombudsman nagsugo na i-dismissed si Guo sa opisina huli sa grave misconduct.
