Pig-imbestigaran na kan Department of Interior and Local Government (DILG) an nagluwas na alegasyon na sarong espiya kan China an nadismis na si dating Bamban, Tarlac mayor Alice Guo.
Nagluwas sa pagdangog kan Quad Committee kan Kamara kan nakalihis na Biyernes na banggi an sarong documentary video kun saen pig-amin ni She Zhiijiang, sarong self-confessed Chinese spy na siya suboot asin si Guo an mga espiya na handang ialay an buhay sa China’s Ministry of State Security (MSS).
Sigun ki Abalos, matao siya nin kasuguan ki PNP Chief P/Rommel Francisco Marbil tanganing surion an seryosong alegasyon kan detenidong Chinese spy na magkadayon sinda ni Guo sa misyon.
Marurumduman inot nang pigdudahan an nagkuriyat asin an sangkaterbang bilang kan mga Chinese nationals na nagdagsa sa nasyon, nagkapira digde an mga estudyante suboot asin mga negosyante na nagkuriyat sa bilog na nasyon partikular na harani sa EDCA (Enhanced Defense Cooperation Agreement) sa Cagayan. Sa nasambitan na video pigsaysay ni She na si Guo dae dapat pagkatiwalaan asin pig-inkaminar kaini na sabihon sa buong mundo an katotohanan huli ta bistado na ini.
Dugang pa ni She, naghagad suboot si Guo na pondohan kaini an mayoralty campaign kaini sa nasyon kan nakalihis na Mayo 2022 polls alagad pigsayumahan kaini. Mienterastanto pigtawan doon ni Guo na mayo siya nin anumanan na koneksyon ki She asin desididong mag sunad nin kaso laban digde.
