NAGA CITY-Pigsugo na kan alkalde kan siyudad nin Naga an magkakanigong opisina kaibahan an mga namamayo sa barangay na magpreparar katakod kan bagyong Kristine.
Sa nagin paghampang sa mga kagawad kan media ni Naga City Mayor Nelson Legacion, sinaysay kaini na enot ng nagpautob nin suspension kan face to face classess sa Naga City huli sa makusog na pag-uuran na dara kan nasambitan ng bagyo.
Apwera digde, nagpababa naman nin kasuguan an alkalde sa ENRO, SWMO-Naga, sa iba pang opisina na magin preparado sa pigbabantayan na raot kan panahon.
Kaibahan soboot sa deriktiba na ini an mga namamayo sa barangay na kun saen piglalaoman na gigubuhon an saindang obligasyon asin nakamonitor sa saindang area of jurisdication tanganing makapagresponde enkaso kaipuhanon.
Mientrastanto, pigtawan duon man ni PLtCol. Chester Pomar,tagapagtaram kan NCPO na puspusan naman an preparasyon kan Naga City Police Office katakod sa nasambitan ng bagyo orog na an pagbilog kan Search and Rescue na sarong standard operating procedure maski dae deriktang matama an bagyo sa siyudad.
Apwera digde, igwa man nakapreparar na team na magseserbeng First responder sa panahon kan kasiributan.
Sa ngunyan, hagad na sana ni Pomar an kooperasyon kan publiko tanganing malikayan na makapagrehistro nin casualties sa panahon kan kalamidad.
