NAGA CITY- Pigtawan duon kan alkalde kan Naga City na sarong importanteng event an pigkundusir na coordination meeting asin an pagtinta kan Memorandum of Agreement sa manlaen-laen na kapartner na ahensiya tanganing masierto na magigin matrayumpo asin salbado an isasagibong ika-100 na Canonical Coronation ni Ina Peñafrancia.
Sa nagin patara-tara ni Naga City Mayor Nelson Legacion, sinaysay kaini na an siyudad nin Naga an nagseserbeng harong asin nag-aako kan milyones na deboto ni Ina asin El Divino Rostro kun kaya kaipuhan an pagkasararo tanganing magin exceptional na okasyon an Peñafrancia Fiesta sa presenteng taon.
Sigun pa sa opisyal, an Naga City an pigmirar komo No.1 tourist destination sa Bicol Region asin no. 7 sa bilog na kinaban na kun saen tuyong bulan nin Setyembre, nairerehistro an pinakadakol na turista na nagbibisita sa siyudad.
Katakod kaini, kaipuhan an pagkakaigwa nin well-coordinated asin smooth operation kan manlaen-laen na ahensiya tanganing malikayan an anuman na aberya o insidente.
Apwera digde, importante man soboot an pagkakaigwa nin effective information, professionalism, dedikasyon kan gabos nin huli ta ini an paagi tanganing maabot an trayumpo sa nasambitan ng aktibidad.
Sa ngunyan, hagad na sana liwat kan alkalde an kasalbaduhan, pagigin solemn asin pagigin matrayumpo kan Peñafrancia Festival sa siyudad nin Naga, ngunyan na taon.
