NAGA CITY – Maogma sa kaplanuhan ni Presidente Ferdinand Marcos Jr. an alkalde kan Tinambac, Camarines Sur na ibalyo sa mga LGU an pagtabang sa DEPED sa pagpapatugdok nin mga classroom.
Sa entrevista kan Bombo Radyo Naga ki Mayor Edward Albert “Bobit” Prades kan LGU Tinambac, sinaysay kaini na mas marhay kun ibaba sa LGU an siring kaining proyekto huli ta mas aram kan mga opisyal an mga primerong pangangaipuhan kan mga tawo partikularmente sa edukasyon.
Sa paagi kan nasambitan ng lakdang pupwedeng ma-maximize kan LGU an budget asin kadakol an adventahe huli ta igwang bastanteng monitoring kaini asin pwede pang makatabang sa local hiring na kun saen madudugangan an manpower kan paggibo nin mga classrooms asin ini magayon na lakdang tanging magkaigwa man nin trabaho an mga nasa lokal.
Dugang pa kan opisyal, enkaso man matawan nin oportunidad an nasambitan ng banwaan enot na aaramon an guidelines kan budgeting asin mga limitasyon.
Mientrastanto, pigtawan duon pa ni Prades na mas magigin maogma an banwaan kun mapipili asin sisiertohon kan gobierno nasyunal na an budget ma-maximize sa banwaan nin tama.
Sa ngunyan, pigsierto na sana kan nasambitan ng alkalde na suportado kaini an anuman na programa na pigbubusol para sa edukasyon nin huli ta saro man soboot ini sa saindang prayoridad.
