Sa ibong kan mga komento asin kritisismo dapit sa saiyang mga kakayahan, si Alyssa Valdez nagpatunay liwat kan saiyang dedikasyon sa paghampang para sa nasyon komo parte kan Alas Pilipinas women’s volleyball team.
Sa ipigkundusir na pagtiripon an 32-anyos na volleyball star pigtawan-duon kaini na dae ini mapapaurong nin ano man na kritisismo habang kaya pa kaini na magrepresenta sa Pilipinas.
Dawa dae kaini pigdetalye an saiyang pagbalik sa nasyonal na koponan, pighiras kaini an kaogmahan na makaiba asin makakatabang sa mga hoben na parakawat na ngunyan collegiate players
Segun ki Valdez, mawot kaini na magserbing inspirasyon asin giya sa mga bagong atleta mantang nag-aandam an grupo para sa AVC Challenge Cup na gigibuhon poon Hunyo 6 hasta 14 sa Candon.
Nangapudan man ini sa publiko na suportaran an national team asin naglalaom na mas dakul pang mga parakawat an makisumaro sa preparasyon kan Alas Pilipinas.
Mientrastanto, pigsierto man ni Valdez na nasa marhay na kondisyon siya makalihis na makarekober sa mga lugad na saiyang sinapo kan mga nakalihis na taon.
Kabali sa mga enot na nag-atendir sa training camp iyo an nagkapirang collegiate standouts hale sa Far Eastern University, Adamson University, University of the Philippines, asin Colegio de San Juan de Letran.
Piglalaoman man na madudugangan an numero kan mga partisipantes sa nasabing training, kabale na an nagkapirang mga prominenteng players hale sa Premier Volleyball League asin mga atleta hale sa National University.
