NAGA CITY- Makulog an boot kan ama ni PS/Supt. Allan Nobleza sa pagkakaimdamay kan saindang pangaran asin pamilya sa isyu na kinakahampang kan dating esposa kaini na si P/Supt. Maria Christina Brugada-Nobleza.
Sa ekslusibong entrevista kan Bombo Radyo Naga kay Alejandro Nobleza, sinaysay kaini na maraot an saiyang boot na nadadamay ngonyan an saindang apelyido sa kontrobersiya na kinakaimbweltuhan kan nasambitang babaeng police colonel na dating esposa kan saiyang aki.
Sa ibong kaini, pigtuga man ni Nobleza na mayo siyang kaanggutan ki Tintin alagad nakiolay man ini sa opisyal na untukan na an paggamit sa saindang apelyido.
Taong 2010 pa kan magsuwayan an saiyang aki asin si Tintin.
Nagtugot sana suboot si PS/Supt Nobleza na gamiton an saiyang apelyido para sa saindang mga aki.
Sa ngonyan, sigon ki Nobleza, nakaolay na niya an saiyang aki na presenteng nasa Pilipinas asin sinaysay kaini na dapat na magtenir sana sindang kalmado katakod kan kontrobersiya na kinakahampang ni P/Supt. Maria Christina Brugada-Nobleza.
