NAGA CITY – Piglinaw kan sarong opisyal kan Comelec sa Goa, Camarines Sur na dae pa man maiikonsiderar na early campaigning an pagpapaskil nin mga tarpaulin kan mga kandidato hasta dae pa sinda nakakapag file nin candidacy.
Sa entrevista kan Bombo Radyo Naga ki Dionisio Miguel, Election Officer III-ERB Chairman kan COMELEC Goa, Camarines Sur, sinaysay kaini na basado kaya sa ruling kan Comelec hasta dae pa nagpupuon an filing of candidacy o dae pa nakapag file kan saiyang kandidatura an sarong indibidwal mayo pa nin kandidato.
Boot sanang sabihon dae pa maiikonsiderar na early campaigning an ginigibo kan iba na amay na pagpapaskil kan saindang mga tarpaulin.
Kun kaya nasa mga botante na an magigin desisyon asin sinda an dapat na maghinimbang kun sisay an mga karapatdapat na magtukaw sa mga posisyon kan gobierno orog na ta ngunyan pa sana mahihiling na kun sisay an mga dae makapaghalat sa tamang panahon asin oras tanganing mangampanya.
Dugang pa ni Miguel na mayo pa man sinda nin nareresibeng kasuguan kun dapat bang haralion an nasambitan ng mga tarpaulins orog na an mga nakadukot sa mga pampublikong mga lugar.
Sa ngunyan, naghahalat pa man soboot an saindang lado kan magigin kasuguan kan saindang main office kun irerequired liwat na sulamenteng mga recycable materials sana an gamiton komo campaign materials para sa nagdadangadang na 2025 midterm election.
