Ambulansya kan Prov’l. Health Office-Catanduanes, inarado an sarong kubo sa CamSur; minor injuries, sinapo kan 5 persona kabale an 2 umboy
NAGA CITY- Nasa salbado nang kamugtakan an limang persona kabale na an duwang mga umboy makalihis na araduhon nin ambulansya kan Provincial Health Office kan
Catanduanes an sarong kubo sa banwaan nin Ragay, Camarines Sur.
Sa entrevista kan Bombo Radyo Naga ki SPO4 Albert Joven, tagapagtaram kan PNP Ragay, sinaysay kaini na nawaran nin kontrol sa saiyang pigmamanehong ambulansya si Donald
Sorreda, 35-anyos mantang binabagtas an kalabaan kan Rolando Andaya Highway sa Barangay Amomokpok, rason para aksidente ining magsalpok sa steel barricade asin nagdire-
diretso pa sa kubo na yaon sa gilid kan tinampo.
Nagsapo nin gasgas sa saindang lawas an magkakaparyentes na nakaistar sa kubo na sinda Judylynn Belleras-Nuñez, 21-anyos; 13-anyos na daragita asin an sampulong bulan na
umboy mantang nairido man sinda Miccahella Parafina, 20-anyos asin an apat na bulan na umboy.
Sigon ki Joven, hale sa probinsya nin Catanduanes asin mahatod kuta na nin pasyente sa Philippine General Hospital sa Ermita, Maynila an ambulansya kan mangyari an aksidente asin
pigtuga mismo kan driver na si Sorreda na natungka siya mantang nagmamaneho.
Paramientras man suboot na nagtinir sa Ragay District Hospital an pasyente kan ambulansya mantang mayo man nairido sa limang lunad kaini.
Mientrastanto, tulos man na nakaluwas sa ospital an limang mga biktima makalihis na matawan nin atensyong medical an pigsapong gasgas sa saindang lawas.
