Binawian nin buhay an anom na katawo huli sa epekto kan trough kan Bagyong Ferdie asin Habagat.
Sigun sa National Disaster Risk Reduction and Management Council (NDRRMC), apat sa mga naireport na binawian nin buhay an gikan sa Bangsamoro Autonomous Region in Muslim Mindanao mantang an duwa an gikan sa Region 9 o Zamboanga Peninsula.
Mientrastanto, 11 man an naireport na nalugadan mantang duwa an nawawara.
Naglobo man sa 13,825 an mga indibidwal o katampad kan 3,528 pamilya an nagtitinir sa 133 evacuation centers sa Regions 5,6,7,9,10,11,12 asin BARMM.
Padagos man an pagpapaabot nin tabanga kan gobierno sa mga apektadong pamilya.
