NAGA CITY- Pigsaysay kan sarong estudyante na dakula an naitatabang kan Artificial Intelligence sa pag-aadal.
Sa entrevista kan Bombo Radyo Naga ki Ardy Mimay, sarong College student, sinaysay kaini na enkaso may mga bagay o konteksto na magulo o masakit intindihon kan mga estudyante nagsasangguni soboot sinda sa credible na AI tanganing makua nin kasimbagan.
Sigun ki Mimay, an mga simbag, ideya o impormasyon na saindang nakukua sa AI an pig-eenhance pa ninda tanganing mas magayon an resulta.
Dugang pa kaini, dakulang tabang man an AI sa pagpaphayag kan saindang kaisipan asin malikayan na mahaluyan sa mga ginigibo sa eskwelahan.
Dati soboot kaya kaipuhan pa na magsangguni sa mga libro, professor asin mga tawong nakakaaram dapit sa certain na impormasyon o research na saindang ginigibo alagad sa tabang kan AI mas napapadali an pagkua nin mga kinakaipuhang information.
Mientrastanto, pig-ako man kaini na kaipuhan may limitasyon an paggamit kan AI asin dae dagusang maging dependent digde huli ta importante na magkaigwa nin orihinal na ambag sa mga ginigibo sa eskwelahan.
