NAGA CITY- Naglalaom an lado ni Vice President Leni Robredo na magiging mas responsable na ngonyan si Asst. Sec. Mocha Uson sa pagtatao nin pahayag urog pa ta parte na ini kan Presidential Communications Operations Office (PCOO) kan gobyerno.
Ini an sinaysay ni Georgina Hernandez, tagapagtaram kan bise presidente sa entrevista kan Bombo Radyo Naga.
Sigon ki Hernandez, naglalaom sinda na magiging responsable na si Uson sa pagpapaluwas nin mga impormasyon asin pagtatao nin komento manungod sa nangyayari sa nasyon urog pa ta saro na ining halangkaw na opisyal kan gobyerno.
Kinakaipuhan man suboot na basado sa mga totoo asin lehitimong impormasyon an ipapaluwas kaini sa publiko.
Sinaysay man ni Hernandez na dae na ikinabigla kan saindang lado an appointment ni Uson sa PCOO urog pa ta enot naman ining na-appoint sa Movie and Television Review and Classification Board (MTRCB).
Mientrastanto, tinawan doon man ni Hernandez na nakaandam an saindang lado na makipagtabangan ki Uson para sa ikauuswag kan nasyon.
