Pigreport kan American agency na National Aeronautics and Space Administration (NASA) na mayo ng signipikanteng huma na dara an asteroid 2024 YR4 sa kinaban.
Kan nakalihis na aldaw nin Lunes, pigsaysay kan NASA sa paagi kan Jet Propulsion Laboratory’s Center para sa mga Near-Earth Object Studies an nagbaba na an huma na dara kan nasambitan ng asteroid.
Susog sa latest forecast gikan sa mga eksperto, mayo ng potensyal na magtama an asteroid sa kinaban sa laog nin pirang dekada.
Marurumduman, enot ng pigreport kan NASA na an 2024 YR4, na pigkakarkulo na igwang 40-90 meters an sukol an igwang minimal na tsansa na magtama sa maabot na Dec. 22, 2032 kun saen pwedeng makadanyar sa haros sarong bilog na siyudad.
An impact probability kan asteroid an naglangkaw pa sa 3.1 percent kan nakalihis na Pebrero 18, na iyo man an maikokonsederar na highest impact probability na nairehistro kan NASA. Alagad liwat na binaba kan NASA an impact probability sa 1.5 percent.
Dakula man an pagpapasalamat kan mga eskperto nin huli ta nagkaigwa nin marhay na bareta dapit sa nasambitan ng asteroid asin nakabawas sa problema kan planeta.
Sa ngunyan, padagos an pagbabantay kan NASA sa mga celestial body orog na na igwang mga posibilidad na makadanyar sa kinaban.
