Dae kampante si dating Presidential Spokesperson Atty. Harry Roque na aakuon kan Marcos administration si dating Presidente Rodrigo Duterte enkaso tugotan an saiyang interim release.
Ini an makalihis na hagadon kan defense counsel kan dating Presidente na si Nicholas Kaufman sa Marcos administration na tugotan an dating Presidente na makauli na sa nasyon enkaso magtugot an International Criminal Court (ICC) sa saiyang kahagadan para sa interim release huli sa saiyang naglalalang salud huli na man sa saiyang edad.
Sa sarong live video broadcast, kinuwestiyon ni Atty. Roque kun saen naghuhugot soboot nin kumpiyansa an lead counsel kan dating Presidente na kaya kaining makumbinsi an mga Marcos para digde sa Pilipinas darahon an dating Presidente sa bisa kan interim release.
Nasisierto soboot ni Atty. Roque na igwang pighagad na karibay enkaso akuon kan Marcoses an dating Presidente, asin ini an pagreretiro kan bilog na angkan kan Duterte gikan sa pulitika, bagay na dae na man sana soboot mangyayari.
Sa ibong kaini, kumpiyansa si Atty. Roque na igwang iba pang mga nasyong preparadong mag-ako sa dating Presidente kaibahan na sa digde an nasyon kan Belgium, asin Japan.
