Pig-anunsyar ni Australian Prime Minister Anthony Albanese na bibistuhon na kan Australia an estado kan Palestine sa maabot na sesyon kan United Nations (UN) General Assembly sa Setyembre 2025.
Sigun ki Albanese, an desisyon, isinagibo makalihis na makua kan Australia an mga promesa gikan sa Palestinian Authority, kaibahan an demilitarisasyon, pagdaraos kan eleksiyon, asin padagos na pagbisto sa Israel sa rehiyon.
Ginibo an pahayag kasunod kan pag-urulay kan mga lider gikan sa UK, France, New Zealand asin Japan.
Maduon man na tinutulan kan Israel an lakdang, asin sinabing ini an reward sa mga terorista, orog na ta padagos pa man giraray an opensiba kaini kontra sa Hamas sa Gaza, kun saen labi 61,000 na katawo na an naireport na binawian nin buhay puon kan nakalihis na taong-2023 sigun sa Hamas-run health ministry.
Sa ibong na banda, sinabi man kan Palestinian Authority na an pagbisto kan mga nasyon an padagos kan naghehewas na suporta para sa derechos kan mga Palestino tanganing magdesisyon.
Dugang pa digde, pigsierto pa ni Albanese na dae kaini tatawan nin papael an Hamas tanganing panghimasukan an Palestine.
Mientrastanto, nanindugan mana an Estados Unidos na dae kaini bibistuhon an estado kan Palestine sa ngunyna huli soboot s akawaran nin epektibong gobyerno.
Binatikos man ni Israeli PM Benjamin Netanyahu an Australia asin mga nasyon sa Europa sa saindang lakdang na pig-aapod kaining “shameful.”
Sa presente, 147 na mga nasyon sa 193 miyembro kan UN an nagbibisto sa estado kan Palestine, na igwang “permanent observer state” status sa organisasyon.
