NAGA CITY- Pinahewas pa kan lokal na gobierno kan siyudad nin Naga an kaaraman sa isyu kan depression.
Sigun ki Magno Reyes, Registered Nurse asin Head kan Mental Health Division kan City Health Office, na bako sana sinda sa mga barangay nakatutok alagad magin sa mga eskwelahan.
Ini an katakod kan pagbisita kan mga personahes kan nasambitan ng opisina sa mga bara-barangay sa enot na parte pa sana kan taon o antes pa man na magpuon an mga pagpreparar sa Peñafrancia festival.
Sigun pa ki Reyes, nakikipag-ulay sinda sa mga estudyante sa paagi kan saindang pigsasagibong Mental Health Awareness Program, kun saen, pig-eesplikar ninda kun pano malilikayan na ma-depress.
Positibo man an resulta sa mga estudyante asin kadakol an mga hapot kan mga ini dapit sa tamang paglikay sa stress na kawsa kan depression na dapat enot nindang ipinapaarama sa mga magurang kaya man sa saindang mga paratukdo asin dae masupog o matatakot.
