NAGA CITY – Arestado an saro katao mantang nakadulag an AWOL na pulis na soboot nagpabistong miembro kan New People’s Army (NPA) sa entrapment operation kan mga otoridad sa syudad nin Naga.
Binisto an naaresto na si Dante Gallarte mantang pinaghahanap na an AWOL PNP personnel na si Rodel Antonio.
Sa entrevista kan Bombo Radyo Naga ki PMaj. Van Layosa, Naga City Police Office (NCPO)-Station 4, sinaysay kaini na nagpabisto si Antonio sa biktimang si Joana Marie Martija na miembro kan rebeldeng grupo asin naghahagad nin P75,000.
Sigon ki Layosa, hinold kan suspek an biktima asin sinugong makipag-koordinar sa katrabaho kaini para makakua kan pighahagad na kantidad.
Alagad kan mga oras na kukuanon na kan suspek an kwarta, biglang nag-abot an mga pulis asin naabutan kan mga ini an biktima asin an kaibanan ni Antonio mantang nakadulag man an dating pulis.
Sa suway na entrevista kan Bombo Radyo si Gallarte, pinahimutikan kaini an nasambitan ng krimen asin sinasabing nadamay sana siya makalihis makisabay sa saiyang motorsiklo an suspek kaibanan an biktima.
Dugang pa kaini, dae niya man soboot aram na igwa palan nin iligal na transaskyon si Antonio kan mga oras na ito kung kaya pinasakay niya man.
Sa ngunian, pigpepreparar na ang kasong isusunad kontra sa suspek mantang pinaghahanap naman si Antonio na sinasabing nag-AWOL sa serbisyo makalihis maembwelto man sa iligal na gibo.
