Pig-anunsyar ni Presidente Ferdinand Marcos Jr., an mas pinasimple asin marekas na proseso para sa subsidiya sa kuryente asin pagpapautob kan solar net-metering para sa mga pamilyang Pilipino, orog na an mga nasa marginalized sector.
Sa ginanap na “Collective Response to Presidential Commitments In the Energy Sector” sa Meralco Theater, pigtawan-duon kan Presidente na obheto kan administrasyon na gibuhong abot-kaya asin malalaoman an serbisyo kan kuryente sa paagi kan paghahali kan mga kumplikadong burukrasya.
Ipinahayag kan Presidente an pagpapautob kan automatic registration kan gabos kan benepisyaryo kan Pantawid Pamilyang Pilipino Program (4Ps) sa irarom kan Lifeline Rate Subsidy Program (LRSP).
Sigun sa Presidente, nasa 334,000 sana o 11 porsiyento kan kabilogang 3 milyong benepisyaryo kan 4Ps an nakikinabang sa diskwento huli sa dati, kumplikadong mga rekisito.
Hurot kan Presidente, bako dapat an Pilipino an naghahabol sa tabang kundi an tabang an dapat na naghaharani sa mga Pilipino.
Sa irarom kan bagong threshold, an mga pamilyang 4Ps na nagkokonsumo nin 50 kilowatt-hour (kWh) pababa kada bulan an makakaresebir nin 100 porsiyentong diskwento sa saindang bill.
Pwede mang mag-apply an mga pamilyang laog sa poverty threshold maski dae sinda miyembro kan 4Ps.
Apwera sa subsidiya, pigbukasan man kan Presidente an mas marekas na pintuan para sa Net-Metering Program.
An programang ini an nagtutugot sa mga kaharongan na igwang solar panels na ipabakal an saindang sobrang kuryente pabweltada sa grid tanganing mabawasan an saindang babayadan.
Nagpaluwas nin Joint Memorandum Circular an DOE, DILG, asin DPWH para sa paggamit kan standardized application forms sa mga LGU.
Sinugo kan Energy Regulatory Commission (ERC) an mga distribution utilities (DUs) na tapuson an proseso kan koneksiyon sa laog sana kan 20 working days.
Binisto man kan Punong Ehekutibo an importanteng papel kan MERALCO sa pagbubusol kan mga obhetong ini, kaibahan an Terra Solar Project na mapahewas sa renewable energy capacity kan nasyon sa paagi kan large-scale solar asin battery storage.
Pig-enkaminar ni Presidente Marcos an gabos kan mga Pilipino na samantalahon an mga bagong inisyatibong ini tanganing masierto an mas matatag asin mas baratong suplay kan enerhoya para sa saindang mga pamilya.
