NAGA CITY- Pinagbabadil gadan kan riding in tandem suspects an sarong babae sa ciudad nin Tayabas.
Binisto an biktima na si Anabel Boo, 29-anyos.
Sa report na ipinaabot kan Tayabas City-PNP sa Bombo Radyo Naga, napag-araman na basado sa saindang inisyal na imbestigasyon, naglalakaw si Boo sa Barangay Wakas kan bigla na sanang pagbabadilon kan duwang lalaki na lunad nin motorsiklo.
Nagsapo nin tama kan bala sa manlae laeng parte kan saiyang lawas an biktima na pinurbaran pa kuta ng idalagan sa ospital alagad pigdeklarar na ining dead on arrival kan mga doktor.
Narekober sa crime scene an anom na basyo nin bala para sa 9 mm pistol, sarong deformed bullet asin sarong metal fragment.
Hinagad man kan PNP an asistensya kan Scene of the Crime Operatives (SOCO) para sa pagproseso sa crime scene.
Sa ngonyan, blangko pa an mga otoridad sa motibo sa panggagadan sa biktima siring man an pagkakabistuhan kan mga gunmen na marikas na nagdulag makalihis an ginibong pambabadil.
