Aram baya nindo mga ka-Bombo, viral sa Chinese social media an video kan sarong babaing pasahero na napiritang tanggalon an saiyang makeup gamit an wet wipes makilihis na dae ini mabisto kan facial recognition scanner sa Shanghai Airport.
Nakuanan ini kan Setyembre 2024, kun saen sarong babae na nakasuolot nin puting blouse asin maroon vest mantang pigpupunasan an saiyang lawgon sa hampang kan sarong salming.
Igwa man nin madadagog na boses sa background, na posibleng staff kan airport security, na sinasabihang tanggalon an gabos nin makeup tanganing magin kalawgon kan babae an saiyang passport.
Dae malinaw kun nakalusot sa scanner an babae pagkatapos kaining magtanggal nin makeup, alagad marekas na nagin usap-usapan an insidente online.
Sa kaibang ladawan gikan sa video, mahihiling an pagkabalisa kan babae mantang pigpoporbaran na ibalik an natural kaining itsura.
Kadakol an naogma sa insidente asin igwa man nin pirang nagdepensar sa babae, sinasabing dae na kaipohan pang ipasupog ini sa publiko, mantang an iba man an nagtuyaw sa teknolohiyang gamit sa airport.
