NAGA CITY– Gadan an sarong bados mantang iridu man an siyam na iba pa kaibanan an duwang menor de edad makalihis mahulog an piglulunadang van sa sarong ampas sa Quirino Highway, Barangay San Francisco, Tagkawayan, Quezon.
Sa entrevista kan Bombo Radyo Naga ki PC/Insp. Dandy Aguilar, Chief of Police (COP) kan Tagkawayan-PNP, binisto kaini an nagadan na si Sagira Haji Ebrehim.
Sigon ki Aguilar, gikan sa Lanao del Sur an mga biktima asin pasiring kuta na sa Maynila kan mawaran nin kontrol an driver sa nasambitan ng lunadan hasta sa makasalpok ini sa sarong tindahan asin waiting shed sa lugar antes dagos na nahulog sa ampas.
Katakod kaini, nagsapo nin lugad sa manlaen laen na parte kan lawas an siyam na pasahero kaibanan an driver mantang dae na naisalbar pa an buhay kan naambitan ng bados.
Sa ngunian, nagpaparahay na an nagkapira sa mga nairidung pasahero sa Bicol Medical Center sa syudad nin Naga.
