NAGA CITY- Ipapadagos soboot kan bagong acting Division Manager kan Camarines Sur Irrigation and Management Office an magagayon na napuonan kan dating administrasyon.
Sa nagin paghampang sa mga kagawad kan media ni Engr. Jessie Baynas, Acting Division Manager kan Camarines Sur Irrigation and Management Office, sinaysay kaini na marhay an nagirinibuhan ni Engr. Bragais kun kaya pigsierto kaini an saiyang 100% na commitment tanganing mas matabangan pa an mga irrigators association asin farmers.
Sigun pa ki Baynas an mga magayon asin marhay na practices gikan sa saiyang hinalian na opisina an saiyang i-implement sa Camarines Sur tanganing mas masuportaran pa an mga paraoma.
Katakod kaini, plano soboot kan opisyal na magpa-apod nin NIA dialogue tanganing maghagad nin request sa mga irrigators and farmers kan saindang mga kahagadan tanganing maibali sa saindang proposal.
Mientrastanto, pigpasalamatan man ni Baynas an mga staff kan nasambitan ng opisina huli sa saindang 100% na suporta sa saiya asin pigsierto na mas magayon pa an saindang accomplishment sa mga masunod na panahon.
Sa ngunyan, yaon an bilog na suporta kan bagong administrasyon sa mga paraoma tanganing matabangan an mga ini na mapa-angat an mga buhay.
