Nag-abot na sa Pilipinas an bagong guided missile corvette-class warship gikan sa South Korea na igwang advanced weapons asin radar systems.
An 3,200 toneladang warship na aapudong BRP Miguel Malvar, an saro sa duwang corvette-class warships na parte kan kasunduan kan Pilipinas asin South Korea kan nakalihis na taong-2021.
Hango an pangaran kan enot na corvette sa rebolusyonaryong heneral kan Pilipinas asin bayani na si Miguel Malvar.
An sister ship kaini na BRP Diego Silang an pormal na piglunsar sa Ulsan, South Korea kan nakalihis na bulan alagad nakatalaan pa sana ining ipdara sa Pilipinas.
Pinangenotan man ni Defense Secretary Gilberto Teodoro an arrival ceremony kan warshio sa Naval Operating Base sa Subic, Zambales. Digde, pigresebir kan Philippine Navy an sarong barkong pandigma.
Sa saiyang patara-tara, sinaysay kan sekretaryo na an pag-abot kan BRP Miguel Malvar sa nasyon an bako sana tanganing magsirbing deterrent asin tagapagtanggol kan katubigan, kundi komo sarong importanteng parte sa joint asin combined operations kaibahan an mga kaalyadong nasyon.
Marurumduman na enot na pig-anunsyar an kasunduan para sa duwang bagong warship kan nakalihis na 2021, limang taon makalihis manggana an kontrata kanHyundai Heavy Industries para sa paggibo kan duwang bagong frigate para sa Philippine Navy.
An corvettes an sadit asin marekas na barkong pandigma na primerong piggamit sa pagprotehir sa ibang mga barko gikan sa mga pag-atake.
An pag-abot man kan bagong barkong pandigma kan Pilipinas an sa tahaw kan padagos na komprontasyon sa tahaw kan mga barko kan Pilipinas asin China sa West Philippine Sea.
