Pigtutukdong saro sa mga rason kan Department of Agriculture (DA) sa paglala pa kan danyos sa sektor kan agrikultura sa nasyon tuyong igwang nagtatamang kalamidad an bakong epektibo na nagkapirang flood control projects.
Sigun ki Agriculture spokesperson ASec. Arnel de Mesa, kun epektibo sana an flood control projects, mas dikit an danyos sa sektor kan agrikultura.
Ipigreport kan opisyal na nagpapakol sa 500,000 hasta 600,000 metrikong tonelada an natatamong danyos sa agrikultura kata taon huli sa matitinding pagbaha, na kadaklang nasasalanta iyo an mga paroy.
Paliwanag ni Asec. De Mesa na kun madali sanang maghupa an mga baha, marekas man an pag-rekober kan paroy huli man ta pigpapatubigan man talaga ini alagad dae kaini kakayanon kun haloy ng nakababad sa tubig-baha.
Apwera pa sa paroy asin crops, sinaysay man kan DA official na pwedeng maghantong an mga pagbaha sa pagkagadan kan livestocks asin danyos sa mga pasilidad para sa irigasyon asin agricultural infrastructure.
Marurumduman, kan nakalihis na Hulyo, ipigreport kan DA na mapakol sa P3.53 billion an pinag-iribahang kantidad kan danyos sa panlalamasa kan magkakasunod na bagyong Crising, Dante asin Emong asin Hanging habagat.
Katakod kaini, imbes soboot na pondohan an flood control projects na napatotoohang bakong epektibo, mas marhay soboot gamiton na sana an mga pondo para sa irrigation facilities na mabenepisyo sa mga paraoma asin sa output kan agrikultura sa nasyon.
Sa paagi soboot kan dugang na pondo para sa mga irrigation projects, makakatabang ini tanganing makapagpatindog an DA asin National Irrigation Administration (NIA) nin mas kadakol na drainage asin water impounding projects siring kan mga dam, na ma-imbak kan mga tubig-baha asin gagamiton para sa irigasyon.
