NAGA CITY- Nagkundusir an Bureau of Fisheries and Aquatic Resources (BFAR) Region 5, sa paagi kan saindang Fisheries Integrated Laboratory Section, nin water quality assessment sa Kawit Island, Brgy. Cagsao, Calabanga asin sa Old Caaluan, Tinambac, Camarines Sur makalihis an saindang nareseber na reports dapit sa fish kill sa nasambitan ng mga lugar
Sa sample nin tubig na pigkua kan nakalihis na May 23 sa duwang area nagpapahiling na normal an resulta apwera sa paglangkaw kan ammonia levels.
Alagad sa pigkundusir na follow-up assessment kan Mayo 26 sa tolong reported fish kill sites siring kan Kawit Island, Brgy. Cagsao, Calabanga, asin Old Caaluan, Tinambac nagluluwas na igwang nakaka-alarmang kondisyon nin kaledad kan tubig.
Nahiling sa resulta kan kan pigkundusir na test na igwang signipikanteng pagbaba sa dissolved oxygen sa surface, katahawan asin irarom kan water samples sa gabos na stations, na nag-aabot sa 0.18 hasta 2.07 parts per million, mas hababa kumparar sa the ideal threshold na 5 parts per million .
An Hydrogen sulfide levels an nairehistro sa pag-ultanan kan 58.9 asin 280 milligrams per liter na naglampas sa desirable limit na 0.002 milligrams per liter.
Apwera digde, an Turbidity asin ammonia levels an halagkaw.
An nasambitan ng kondisyon kan tubig an posibleng rason sa pagkagadan kan mga sira sa area.
Mientrastanto, marurumduman, an fish kill na nakaapektar sa nagkapirang parte kan Calabanga asin Tinambac sa Camarines Sur an nagresulta sa pagkalugi kan nasa 3.5 tons kan manlaen-laen na klase kan sira asin crustaceans kan May 23–24, 2025.
Sa ngunyan, padagos an pakikipag-koordinar kan BFAR Region 5 sa local government units kan Calabanga asin Tinambac tanganing padagos na i-monitor an sitwasyon sa lugar.
