Nangapudan an Environmental group na Ban Toxics sa gobyerno na repasuhon asin pakusugon an implementasyon kan Republic Act 9003 o Ecological Solid Waste Management Act of 2000 katakod kan paglangkaw kan mga basurang pig-aapon asin pigtitipon sa Parañaque City.
Sa intrevista kan Bombo Radyo Naga ki Antonio “Tony” Dizon, Ban Toxics Campaign and Advocacy Officer, sinaysay kaini na kabale sa mga mayor na problema iyo an kawaran nin segregation asin source, Functional Materials Recovery Facilities o MRFs, asin supisyenteng fondo para sa waste management.
Tinawang-duon ni Dizon na an mga recyclable, biodegradable asin residual waste dapat na iseparar nin tama antes kolektahon tanganing maibitaran an sistemang “hakot-tambak” na nagigin dahilan kan marikas na pagpuno kan mga landfill asin paglakop kan basura kun may baha o bagyo.
Nangapudan man an grupo para sa mas mahigot na mga polisiya kontra sa mga single-use plastics asin an paggibo nin mga alternatibong gibo sa lokal asin natural na mga materyales. Idinoon man kaini an pangangaipo na atubangon an nagdadakulang problema sa mga mikroplastiko asin protehiran an mga trabahador sa basura.
Mientrastanto, sinabi ni Dizon na kinakaipuhan man na pakusugon kan Ciudad nin Naga an waste management system tangani na maibitaran an kaparehong sitwasyon, urog na sa panahon nin pagbaha asin an Peñafrancia Festival. Saiyang pig-anunsyo na mabisita an Ban Toxics sa Naga ngonian na Agosto para i-promote an saindang mga programa sa adbokasiya sa kapalibutan.
