Idineklarang flood disaster an bilog na Bangkok matapos an haros 48 oras na makusog na urán na nagresulta sa pagbaha sa mga harong, tindahan asin mga tinampo.
Labi sa 300 millimeters nin urán an naitala sa mga lugar poon Huwebes nin hapon sagkod Sabado nin aga. Huli digdi, napiritan si Prime Minister Anutin Charnvirakul na madalion an biyahe kaini sa London tanganing makabalik sa nasyon.
Idineklarang disaster area kan Bangkok Metropolitan Administration an gabos na 50 distrito kan kapital, na nagtao nin dagdag na kapangyarihan sa mga lokal na organisasyon tanganing makaresponde.
Sinabi ni Bangkok Governor Chadchart Sittipunt na “stabilized” na an sitwasyon. Alagad, kun dai na magkaigwa nin dagdag na urán, maaabot pa nin duwa sagkod tulong aldaw bago maubos an tubig-baha.
Abot sa waist-deep an tubig sa sarong mga lugar, mantang an iba na residente napiritan na maglakaw o magtulod nin mga motorsiklo sa baha. May mga sasakyan man na nalunod sa tubig.Nasa 980 katawo an temporaryong nasa mga evacuation shelter, mantang 36 bedridden patients an inilipat sa mga ospital.
Naghanda man an gobyerno kan siyudad nin sarong milyon na sandbag. Dai mababa sa 13 tinampo an binaha. An iba man na convenience store naubusan nin mga pangunahing produkto matapos panic buying an mga residente sa pagbakal.
Huli sa sitwasyon, isasara an mga eskwelahan ngonian na aldaw nin Lunes asin mawork from home man an mga empleyado.
Poon Setyembre 1 sagkod 25, nakapagtala an Bangkok nin 487 millimeters na urán, mas halangkaw kumpara sa average na haros 269 millimeters sa kaparehong panahon hale 1991 sagkod 2020.Mientrastanto, nai-report an pagbaha sa 21 probinsya sa Thailand, mantang inaasahan pa an dagdag na urán sa Domingo.
