NAGA CITY- Nagtitinir na matuninong an banwaan nin Libmanan, Camarines Sur pirang aldaw antes an eleksyon sa Mayo 12.
Sa entrevista kan Bombo Radyo Naga ki Police Chief Master Sergeant Juan Batolina, PIO Libmanan MPS, sinaysay kaini na mayo man nairerehistro na election related incident an saindang hepatura puon kan magpuon an karampanyahan kan mga nakalihis na bulan.
Sigun pa ki Batolina, mayo man nadakop na mga nagbayolar sa pigpapautob na Comelec Checkpoit kun kaya mantinido an paz y orden sa lugar.
Katakod kaini, ngunyan na aldaw i-escortan kan mga personahe kan Libmnan MPS an mga gagamiton na Automoted Counting Machine pasiring sa mga polling precint para sa isasagibo na testing antes an eleksyon.
Babantayan ninda katabang an mga kabuhan kan Philippine Army an nasambitan ng mga machines hasta sa mag-abot an aldaw kan borotohan tanganing malikayan an anuman na klase kan dayaan o pagmanipula sa resulta kan eleksyon.
Mientrastanto, naka-alerto naman an Libmanan MPS kasabay kan pag-arabutan kan mga augmented personnel gikan sa Provincial Office para sa pagbantay sa pig-aapod na places of convergence.
Sa ngunyan, pig-enkaminar na sana ni Batolina an publiko na may-amay sa pagboto tanganing amay man na makatapos asin dae makasabay sa dagsa kan mga tawo.
