Nagtitinir sa orange category an banwaan nin Tinambac, Camarines Sur katakod sa nararaning midterm election.
Sigun ki Kirk Thomas Tate, Election officer III kan Comelec-Tinambac, sinaysay kaini na maski yaon sa orange category an saindang lugar nagtitinir man na matuninong ini huli ta padagos an saindang mahigot na pagpapautob kan mga panundon sa tabang kan mga otoridad.
Katakod digde, an mga basehan sa pagbugtak kan banwaan nin Tinambac sa orange category iyo man an presensiya o sightings kan mga rebeldeng grupo, intense political rivalry asin armed encounters.
Pigtawan duon kan opisyal na bistado talaga an saindang banwaan na igwang mga rebeldeng grupo orog na an mga nasa kabubuludan.
Kinakaipuhan na ibandera an orange category tanganing masimbagan an mga problema na pwedeng kahampangon sa panahon kan eleksyon.
Dugang pa ni Tate, padagos man na piglilinig kan kabuhan kan AFP asin PNP an saindang banwaan kontra sa mga armed group kun kaya naglalaom sinda na mayog magbungkaras na kariribukan ngunyan na papaabuton na midterm elections.
Mientranto, preparado nama an nasa labi 200 na mga paratukdo na maserbe para sa elekyon magin an mga prisento na gagamiton.
Sa ngunyan, naglalaom na sana si Tate na magigin matuninong an 2025 National asin Local Election sa saindang banwaan.
