NAGA CITY- Namamatean ngunyan sa banwaan kan Ocampo sa probinsya nin Camarines Sur an mahal na barakalon patikulamente na sa Ocampo Public Market.
Sa entrevista kan Bombo Radyo Naga ki Eduardo Jallores Jr., Designates Market Administrator kan Ocampo Public Market, sinaysay kaini na sa presente nagkapirang mga reklamo an saindang nareresiber manungod sa halangkaw na presyo kan barakalon sa nasambitan ng merkado.
Alagad basado man sa pagmomonitor ni Jallores sa ibang merkado sa kataraid na banwaan, igwa pa nin mas haralangkaw na presyo kan barakalon.
Katakod kaini, piglatagan man an opisyal kan mga paratienda sa merkado kan saindang mga gastos asin puhunan, na nagpapahiling kun tano kaipohan man langkawan kan mga negosyante an presyo kan saindang produkto.
Sa ngunyan, pangapodan na sana kan opisyal an halawig na pag-intindi orog na ta sa ngunyan, padagos pa an saindang pagpapakarhay kan Public Market sa saindang banwaan.
