PADAGOS an pagtutok kan barangay council kan Concepcion Grande, Naga City sa mga kaso nin HIV asin amay na pagbabados o teenage pregnancy.
Sa entrevista kan Bombo Radyo Naga ki Jerrold Rito, Barangay kapitan kan nasambitan ng barangay, sinaysay kaini na sa ngunyan, mayong naerereport sa saindang opisina na igwa nin nagpositibo maski saro na residente sa HIV.
Alagad padagos an saindang kampanya sa HIV Awareness, ini tanganing mailikay an mga residente sa amay na responsibilidad asin pagkakaigwa nin siring na kahelangan.
Nagpapadagos man an saindang kabuhan sa pagdidistribwer nin mga contraceptives o condums sa mga residenteng nasa tama nang edad, ini tangani man na mailikay an mga residente orog na mga kajovenan sa amay na pagkakaigwa nin obligasyon.
Sa parte kan teenage pregnancy, igwa nin nagkapirang kaso an saindang barangay, alagad padagos nindang ginigibo an saindang makakaya tanganing mapugulan magdakol an siring kaining kaso siring na sana kan padagos na pag-enkaminar sa gabos na mga sultero o daraga na dae muna mag-engage sa arog kaining sitwasyon, dae magpadara sa peer pressure o sa impluwensiya kan mararaot na barkada apwera pa sa pagtatao nin contraceptives.
Dugang pa ni Rito, kung sakaling menor de edad an maghagad, inaassess muna ninda ini alagad sa kadakol na pagkakataon dae ninda ini pigtatawan tanganing dae magkaigwa nin ideya an mga menor de edad sa arog kaining urulay.
