Padagos an pakikipagtabangan kan Barangay Dayangdang sa Department of Labor and Employment o DOLE para mapalawig an livelihood programs sa saindang lugar.
Sa intrevista kan Bombo Radyo Naga ki Brgy. Kagawad Gil “Pogi” Belen, Committee on Livelihood kan barangay, tinawan duon an importansya kan mga programang ini, kabali na an mga lakdang kan Metro PESO na may katuyuhan na suportaran an mga saradit na negosyo asin an mga gustong magpuon nin sadiring negosyo.
Katuyuhan kaini na matabangan an mga residente na magkaigwa nin alternatibong pinagkukuanan nin kita. Kan nakaaging bulan, sarong seminar an ginibo para sa pag-uswag kan saradit na negosyo, kun sain itinao an mga pautang asin fondo hale sa DOLE para sa mga kwalipikadong benepisyaryo.
Piglalaoman man na madudugangan an mga oportunidad para sa komunidad sa paagi kan mga aktibidad sa maabot na panahon. Nakatalaan man sa Marso 21 an mga trainings arog kan haircutting asin iba pang serbisyo na pwedeng kumita nin kwarta kan mga residente.
Parte ini kan mga lakdang kan barangay para mapakusog an lokal na ekonomiya asin matawan nin mas dakul na livelihood options an saindang mga constituents.
