NAGA CITY- Tututukan sa barangay Dayangdang sa siyudad nin Naga an paglinig kan mga drainage komo preparasyon sa epekto kan naeeksperyensiyahan na pag-uuran.
Sigun ki Julius Ceasar Sanchez, Kapitan kan Barangay Dayangdang, dae soboot sinda mapabaya sa paglilinig orog na ta pigkakahandalaan an pagbungkaras nin mga helang na napapanahon tuyong tag-uran.
Katakod kaini, pig-abisuhan ni Sanchez an saindang mga residentes na maglinig kan saindang kanya-kanyang harong asin kapalibutan tanganing mamantinir na marhay an lugar. Mas makakalikay soboot sa kahelangan an mga tawo kun nagtatarabangan asin nakikisumaro para sa kasalbaduhan kan gabos ngunyan na tag-uran.
Dugang pa kan opisyal, makundusir nin clearing operation an Barangay Dayangdang sa mga drainage, gilid kan tinampo asin sa mga maduduot na lugar tanganing dae magin problema enkaso magkusog pa an uran na naeeksperyensiyahan.
Sa paagi kaini natatawan nin pokus an epekto kan uran asin malikayan an pagbutwa kan darakulang problema sa maabot na panahon.
Sa ngunyan, pig-enkaminar na sana ni Sanchez an saiyang mga nasasakupan na makipagtabangan sa sainda para sa karahayan kan saindang lugar.
