APEKTADO na an operasyon kan barangay huli sa apat na aldaw na work schedule na pig-iimplementar sa city hall segun sa liderato kan Barangay Igualdad.
Sa intrevista kan Bombo Radyo Naga ki Angelo Romano Bendiola (Barangay Captain, Igualdad, Ciudad nin Naga), saiyang sinabi na dawa 24/7 an serbisyo sa barangay poon Lunes sagkod Domingo, may limitasyon sa koordinasyon asin pagproseso kan nagkapirang serbisyo huli ta apat na aldaw sana an bukas kan city hall. Dugang pa kaini, mas lalo man an agyat kan padagos na paglangkaw kan presyo kan krudo, na naglilimitar sa paggamit kan yaman kan barangay.
Huli kaini, may mga pagkakataon na an nagkapirang pangangaipo kan komunidad dai tulos matatawan nin atensyon asin pati an paggamit kan mga behikulo sa barangay limitado na sana kun bako para sa opisyal na trabaho. Sa nagkapirang kaso, personal sanang rekurso kan mga opisyal an ginagamit sa pagtao nin serbisyo.
Dakula man suboot an epekto sa mga residente kan oil price hike huli ta naglalangkaw man an presyo kan mga basic necessities. Halimbawa, poon sa dating P150 hasta P175 an bilog na tangke nin motorsiklo, ngunyan nag-aabot na ini sa labi sa P200. Huli kaini, nag-implementar an barangay nin Safe Energy Protocol kun sain piglilimitahan an paggamit nin air-conditioner asin mas ginagamit an electric fans sa opisina. Pigbabawasan man an paggamit kan transportasyon na nakakaubos nin gasolina tanganing makatipid sa yaman kan barangay.
Mientrastanto, nagkapirang mga ordinansa an ipinasar kan sangguniang barangay para masimbagan an manlaen-laen na problema sa komunidad. Kabale digdi an Ordinance No. 2025-004 o Sustained Cleanliness of Canals and Drainage System na may obhetong papagdanayon na malinig an mga kanal asin maibitaran an pagbaha sa paagi kan regular na declogging asin tamang pagmanehar kan basura. Igwa man nin Ordinance No. 2025-005 o Noise Pollution Prevention Ordinance na nagtatagama nin regulasyon sa paggamit nin videoke asin iba pang amplified audio equipment tanganing maibitaran an mga reklamo asin istorbo sa mga residente. Ipinasar man an Kalat Bawal Ordinance na nakasentro sa tamang pag-apon nin basura asin pagpakusog kan environmental responsibility kan mga namamanwaan.
Mientrastanto, pig-iimplementar man an Mandatory Registration of Boarders Ordinance, tanganing makaparehistro sa barangay an mga tenant o bakong permanenteng residente. Katuyuhan kaini na masiguro na kabali sinda sa database kan barangay asin matawan nin ayuda o benepisyo sa oras nin mga kalamidad. Segun sa pamayo kan barangay, importante na magsunod an mga residente sa mga ordinansa antes magreklamo ngani na magin maray an paghatod kan serbisyo. Dugang pa kaini, gikan mismo sa mga residente an mga ideya para sa mga ordinansa. Maski ngani kadaghanan sa mga opisyales sa sangguniang barangay mga first-timers, kini nagsisirbing inspirasyon nganing mas makahimo sa mga polisiya para sa komunidad. Kabali sa mga pigtutukan kan barangay iyo an problema sa layas na ayam, road safety, basura, asin noise pollution.
Tinawang-duon kan hepe kan barangay na dawa ngani bakong bag-o an kadaklan sa mga ordinansa, mas nagiging epektibo an implementasyon kun mismong an barangay an nagbubuo asin nag-iimplementar kan mga lokal na polisiya.
Nagpasalamat ang liderato sa barangay sa media sa paghatag higayon nga ipaabot sa publiko ang mga programa ug proyekto sa ilang gobyerno sa barangay. Idinoon man kaini an importansya kan transparency asin accountability sa pamamahala. Apwera kaini, padagos man an pig-aagihan kan barangay sa proseso kan Lupong Tagapamayapa Incentive Awards (LTIA), asin naglalaom na makisumaro sa media tanganing maipaliwanag sa publiko an proseso kan pagresolber kan mga iriwal sa barangay.
