Pigpakusog kan Barangay Igualdad sa syudad nin Naga an saindang mga programa sa kapalibutan katakod kan pagselebrar kan Earth Month, na nakasentro sa tamang pagmanehar kan basura asin aktibong partisipasyon kan komunidad.
Sa intrevista kan Bombo Radyo Naga ki Angelo Romano Bendiola, Barangay Kapitan Igualdad Naga CitY, sinabi kaini na nagpapadagos an saindang mga inisyatiba arog kan weekly clean-up drive kada Domingo sa lindong kan “Kalinisan sa Barangay Program,” siring man an kampanya sa impormasyon manungod sa tamang pagsegregate kan basura.
Segun ki Bendiola, importante an consistency asin disiplina kan lambang residente para magin matrayumpo an mga programa. Sinabi niya na an responsibilidad sa basura dae dapat ipagpabaya sana sa gobyerno kundi dapat na asikasohon kan bilog na komunidad.
Ipinapautob man kan barangay an “bawal kalat” ordinance asin an “no segregation, no collection policy” para maseguro an tamang separasyon kan biodegradable, non-biodegradable, asin hazardous waste. Katuyuhan kaini na malikayan an mga aksidente sa mga parakolekta nin basura asin mamantenir an kalinigan kan kapalibutan.
Dugang pa kan kapitan na igwang operational na Materials Recovery Facility (MRF) an barangay kun sain pigdadara asin pigpoproseso an mga nakolekta na basura. Nakikipagtabangan man sinda sa manlaen-laen na ahensya asin organisasyon kan gobyerno arog kan Philippine National Police asin lokal na gobyerno kan Naga para sa epektibong implementasyon kan saindang mga programa.
Sa ibong kaini, aminado si Benjola na mantenidong angat an kawaran nin disiplina sa nagkapirang residentes pag-abot sa tamang pag-apon nin basura. Igwa man suboot nin naitala na mga bayolasyon kun sain nagtao nin patanid asin magkakanigong penalidad an barangay sa mga mabalgar.
Sa ibong kaini, nagtutubod an opisyal na pwedeng magdara nin darakulang pagbabago an saradit alagad daing pagliwat-liwat na lakdang.
Bilang pangapodan, pig-enkaminar kan opisyal an publiko na magkooperar sa pagprotehir kan kapalibutan asin gibuhon na pang-aroaldaw na ugale an tamang pagmanehar kan basura para maprotehiran an kapalibutan para sa mga maabot na henerasyon.
